Ditën e djeshme ju njoftuam për një zotëri në shtetin fqinjë, i cili e harroi të shoqen pas një ndalese në autostradë. Ai u rinis për në udhëtim dhe pas 40 kilometrash u kujtua se gruan nuk e kishte me vete. Ndërkohë bashkëshortja e tij gjithashtu italiane, qëndroi duke e pritur buzë rruge me kaskë në duar, pasi çifti udhëtonin me motorr. Më vonë Patrizia 58-vjeçare shpjegoi për mediat:
“Bëri ‘be e rrufe’ se nuk e kishte vënë re. Më tha se në ndalesën tjetër më kishte kërkuar që të zbrisja se do merrnim akullore. Aty e kishte kuptuar që unë nuk isha. Kur do largoheshim nuk po arrija të ngjitesha në motorr dhe prita që ai të bënte manovrën. Ai u nis papritur ndërsa unë i thërrisja nga pas. Mendova se do të kthehej direkt sapo të kuptonte që nuk isha”.
Por Carlo bëri goxha rrugë përpara se të kuptonte se nuk e kishte me vete gruan. Një orë më saktë. Më pas ai telefonoi direkt policinë i frikësuar se e shoqja mund t’i kishte rënë rrugës e të ishte vrarë. Kur kishte nisur kërkimi, Patricia u bë e gjallë vetë: “‘Më ke lënë në këmbë këtu. Je çmendur’, i thashë. Njoftova dhe vajzën tonë duke i treguar se thjesht kishim humbur nga syte njëri-tjetrin. M’u betua se do të ishte më i kujdesshëm herë tjetër dhe e kaloi natën duke më kërkuar falje”./ revistawho.com
