Itali, hedh gruan nga dritarja e hotelit në muaj mjalti

Një burrë ka hedhur nga dritarja e hotelit gruan e tij mbrëmjen e së enjtes. Ngjarja e rëndë ka ndodhur në Itali, në një hotel në Cardano al Campo në Varese. Çifti ishte në muaj mjalti. Ditën e djeshme u ndalua nga policia edhe 51-vjeçari, një turist korean me akuzën e vrasjes me paramendim të bashkëshortes së tij me të njëjtën kombësi, 46-vjeçare. Sipas hetuesve italianë, tre të rinj klientë të hotelit, dëshmojnë së kanë dëgjuar britmat e gruas, dhe më pas e kanë parë të ‘fluturonte’ pasi krahët e burrit e shtynë deri sa ajo nuk mbahej dot më në parvazin e dritares. Sipas guidës që shoqëronte turistët, çifti kishte pasur zënka të vazhdueshme gjatë qëndrimit në Itali. Në vend që të kthehen më 18 maj, dy të sapomartuarit kanë vendosur të qëndrojnë dy ditë më shumë në hotel, teksa janë parë të kthehen në dhomë të dehur. Në brendësi të dhomës së tyre janë gjetur edhe një numër i madh kanaçesh birre bosh. Teksa vazhdojnë hetimet, ende nuk është vendosur marrja në pyetje e burrit dhe autopsia e gruas së tij të vrarë.