Bashkëshortja e Erik Lloshit, Romina, ka qenë e ftuar këtë të shtunë në “BBV Fan Club”, ku ka vendosur t’u japë fund aludimeve për probleme në martesën e saj me këngëtarin, i cili është aktualisht pjesë e “Big Brother VIP 5”.
Ajo u shpreh qartë se mes saj dhe Erikut nuk ka asnjë krizë, duke theksuar se marrëdhënia e tyre është solide dhe se ajo vijon ta mbështesë pa kushte në eksperiencën e tij televizive. Sipas Rominës, zërat për ndarje janë thjesht spekulime pa asnjë bazë reale.
Gjatë bisedës, Romina foli hapur edhe për frikën që kishte para se Eriku të hynte në shtëpinë më të famshme në Shqipëri. Ajo tregoi se shqetësimi i saj lidhej me natyrën e tij emocionale dhe mënyrën se si ai i përjeton situatat e vështira.
“Eriku ka pak temperament të vështirë, është shumë gjaknxehtë dhe i merr gjërat shumë afër zemrës dhe i përjeton shumë. Kjo ka qenë një nga arsyet që nuk doja që ai të hynte në Big Brother. Loja në Big Brother është një lojë shumë e fortë psikologjike, ku njerëzit luajnë të gjitha kartat e mundshme, të familjes, të jetës personale dhe çdo gjë. Është një person që i merr gjërat shumë afër zemrës dhe shumë i drejtë. Nuk është ai agresiv që përpiqet ta përkufizojë në Big Brother”.
Romina shtoi gjithashtu, me nota humori, se para hyrjes së tij në BBVIP ia kishte përmendur edhe “divorcin”, por vetëm si shaka dhe presion simbolik, pasi në realitet ajo qëndron e palëkundur në krah të tij dhe e konsideron këtë eksperiencë një sfidë të vështirë, por të rëndësishme.
