Papa Françesku ka takuar emigrantët në një qendër pritje të tyre në Romë. Ai është përulur emigrantëve myslimanë dhe hindu, duke u larë dhe duke u puthur këmbët. Ati i Shenjtë përmendi edhe rastin e Brukselit, duke theksuar se nuk duhet të ketë ndarje fetare, pasi të gjithë janë vëllezër, pavarësisht besimit. Ati i Shenjtë ka kryer ritualin e përvitshëm për Pashkë, ulet në gjunjë, lan dhe puth këmbët e besimtarëve, por ndryshe nga vitet e tjera, këtë herë shërbimi është bërë ndaj refugjatëve. “Tre ditë më parë ka ndodhur një akt lufte, shkatërrues. Ne këtu kemi fe dhe kultura të ndryshme dhe kështu ne tregojmë se jemi vëllezër dhe duam të jetojmë në paqe. Të gjithë ne, myslimanët, hindutë, katolikët, evangjelistët, jemi vëllezër, bij të të njëjtit Zot që duam të jetojnë në paqe”, është shprehur Papa.
