Pas parashikimit të saktë, të ndeshjes Francë-Rumani, hardhuca “Iguana Arang”, të cilën prestigjiozja “France Football” ka vendosur që të parashikojë sfidat e kombëtares së “gjelave” në këtë “Euro 2016”, ka dhënë prognozën e saj të re edhe për duelin e mbrëmjes së nesërme, Shqipëri-Francë.
Gjitari në fjalë i ka surprizuar të gjithë me zgjedhjen e tij, pasi ka parashikuar një barazim, pa fitues në sfidën e stadiumit “Velodrome”. Hardhuca “Iguana Arang” u afrua me mëdyshje mes dy pjatave me ushqim për të, ku ndodhej stema e fitores së Francës dhe ajo e barazimit. Pasi e hodhi vështrimin disa herë në të dyja pjatat, ajo vendosi të hajë ushqimin te “barazimi”.
Megjithatë, mbetet për t’u parë nëse parashikimi është i saktë, ashtu siç doli në rastin e ndeshjes Francë-Rumani, ku hardhuca nuk gaboi. Në të vërtetë, një barazim nuk do të ishte keq për kombëtaren kuqezi, pasi do ta mbante në lojë për një kualifikim të mundshëm në fazën tjetër të Europianit.
