Eliminimi nga faza play-off e Botërorit 2026 la pas zhgënjim të madh dhe shumë pikëpyetje. Në Varshavë, Shqipëria iu afrua historisë, por u ndal nga detaje të vogla që në fund bënë diferencën.
Jasir Asani, një nga lojtarët që shpesh ka dhuruar emocione me goditjet e tij të majta, këtë herë e përjetoi gjithçka nga tribunat. Mes angazhimit me Partizanin dhe pasigurisë që vjen nga situata në Iran, ku aktivizohet me Esteghlalin, ai ka vendosur të flasë për “Top Channel” në një intervistë për gazetarin Endi Tufa.
Sipas Asanit, rrugëtimi i Kombëtares mbetet pozitiv, pavarësisht fundit të hidhur. Ai thekson se skuadra pati mundësi reale për të ndryshuar fatin e ndeshjes.
“Në përgjithësi ishte një rrugëtim i mirë. Kemi fituar ndeshje të rëndësishme dhe arritëm deri në play-off, por futbolli ndonjëherë është i padrejtë. Në Poloni patëm rastet tona për golin e dytë, por kur nuk shënon, zakonisht ndëshkohesh. Nga tribuna e sheh ndryshe, Bajrami bëri gjithçka mirë, por topi nuk hyri në portë. Ishte thjesht mungesë fati,” u shpreh ai.
Edhe pse mungesa në fushë mund të krijojë pakënaqësi, Asani tregoi profesionalizëm duke mbështetur vendimet e trajnerit dhe duke vlerësuar punën e bërë në ekip.
“Çdo lojtar dëshiron të jetë në fushë dhe normalisht mund të isha i mërzitur, por vendos trajneri. Jam shumë mirënjohës ndaj Sylvinhos – ai më dha mundësinë në Kombëtare. Ka bërë një punë të shkëlqyer: na çoi në Europian dhe na afroi shumë me një tjetër sukses. Meritë e madhe është e tij,” tha ai.
Ndërkohë, jashtë fushës, situata për Asanin mbetet e vështirë. Konflikti në Lindjen e Mesme ka ndikuar drejtpërdrejt në jetën dhe karrierën e tij, duke e lënë të bllokuar në Tiranë dhe larg klubit.
“Kam kontakt me klubin dhe shokët e skuadrës, por shumë pak, sepse interneti është i kufizuar. Shpresoj që gjithçka të normalizohet sa më shpejt. Ata duan që të rikthehem, por është e paqartë sa do të zgjasë kjo situatë. Pa stërvitje është e vështirë, edhe pse kontrata vazhdon. Problemi është që atje nuk funksionon asgjë,” theksoi sulmuesi.
Në këtë periudhë të pasigurt, ai ka zgjedhur të rikthehet aty ku ndihet më i qetë te Partizani. Për të, kjo nuk është vetëm një çështje fizike, por edhe emocionale.
“Partizani është shtëpia ime në Shqipëri. Këtu ndihem mirë, këtu jam rritur si lojtar dhe kam arritur suksese. Shpresoj që skuadra të shpallet kampione, por duhet përqendrim maksimal në çdo ndeshje, sidomos ndaj ekipeve më të vogla,” u shpreh ai.
Për Jasir Asanin, kjo pranverë është ndryshe nga të tjerat. Mes zhgënjimit për atë që mund të kishte qenë në Varshavë dhe pasigurisë për të ardhmen, ai mbetet i fokusuar dhe realist.
Futbolli, siç thotë vetë ai, ka si momentet e bukura ashtu edhe ato të vështira dhe të dyja duhen përballuar. Tani, mbetet koha që të tregojë se cili do të jetë hapi i radhës në karrierën e tij.
