Aktori i humorit Albano Bogdo ka ndarë një rrëfim të hapur për jetën e tij sentimentale gjatë një bisede në “Grida Duma Podcast”.
“Jam fejuar katër herë,” u shpreh Bogdo, duke theksuar se secila prej këtyre marrëdhënieve ka pasur rëndësinë dhe peshën e vet në jetën e tij.
Ai foli edhe për arsyet pse lidhjet nuk kanë funksionuar, duke hedhur poshtë perceptimin se është i paqëndrueshëm në dashuri. Sipas tij, problemi nuk ka qenë mungesa e ndjenjave, por pamundësia për të ndryshuar thelbësisht veten për hir të tjetrit.
“Më duan shumë njerëz, thjesht s’ka funksionuar. Unë kështu funksionoj. Nëse nuk pëlqen… nuk mund të ndryshoj 75% të vetes që të ndihesh ti e lumtur. Ç’kuptim ka bota nëse unë s’jam vetvetja ta shijoj?”, u shpreh ai.
Bogdo pranoi se dashuria ka nevojë për nuanca dhe dinamika, madje edhe për një dozë të vogël “toksiciteti”, por vetëm deri në një kufi të shëndetshëm. “Kur bëhet pak më shumë se ç’duhet, pastaj nuk duhet më,” tha ai.
Një nga momentet më të ndjera të intervistës ishte kur moderatorja e pyeti drejtpërdrejt nëse, në këtë fazë të jetës, e sheh veten si baba. Aktori rrëfeu se për vite me radhë ka pasur një frikë të thellë që lidhet me figurën e të atit dhe me ngjashmërinë që ndjen me të.
“Fobia më e madhe që kam pasur gjithë jetën është sepse e njoh shumë mirë veten dhe i ngjaj shumë babait tim. Nëse vendos të bëhem baba, do ta bëj me dëshirën më të madhe për të qenë pranë fëmijëve të mi deri në fund, për t’u qenë prezent në çdo moment. Nuk më bënte askush të ndihesha se doja të bëhesha baba,” tha ai.
.
