Në një intervistë për “Inspire Podcast”, me Alketa Vejsiun, Zaimina Vasjari foli më hapur për historinë e saj të dashurisë, e cila që në fillesë nuk ka qenë pa vështirësi.
Ajo tregoi se partnerin e ka njohur që në moshën 17-vjeçare. Megjithëse rrugët e tyre u ndanë për një periudhë, jeta i bashkoi sërish, këtë herë me bindjen se ishin personat e duhur për njëri-tjetrin.
“Kur më zgjati dorën dhe tha je zgjedhja ime. Kur luftoi për mua për gjithçka. Ai e shikonte jetën me mua dhe unë mendoj që bëra zgjedhjen e duhur në jetën time. Është një shprehje e bukur që mua më pëlqen shumë, që thotë: ‘Një burrë i vërtetë femrën e tij e bën të lumtur, pjesa tjetër e bën të fortë.’ Unë isha një femër e fortë, pa diskutim, se kam qenë shumë e re kur kam krijuar atë pavarësinë time ekonomike në një moshë fare të re. Pra, isha tashmë një vajzë e fortë. Në jetën time kisha nevojë për një mashkull të më bënte të lumtur. Klodi më dha gjithë lumturinë e botës.”
Ajo theksoi se asokohe lidhja e saj me partnerin ka rënë shpesh pre e gjykimeve dhe paragjykimeve.
“Po, kam qenë e gjykuar, e paragjykuar, ndonjëherë edhe nga njerëz që nuk kanë pasur të bëjnë fare me jetën time. Por, ka qenë e çuditshme që kanë zgjedhur të gjykojnë jetën e dikujt që nuk e njohin fare.”
