Analisti i njohur Arjan Curri ka vizituar së fundmi Shtetet e Bashkuara të Amerikës, ku pati mundësinë të takohej me këngëtaren legjendare shqiptare, Parashqevi Simakun. Gjatë një interviste për emisionin “Top Story”, Curri ndau shqetësimin e tij të thellë për gjendjen e rënduar shëndetësore të artistes së njohur, duke theksuar nevojën urgjente për trajtim mjekësor.
Sipas Currit, takimi me Simakun ishte një përvojë prekëse dhe emocionalisht tronditëse. Ai pranoi se ende nuk e ka përballuar plotësisht dhimbjen e historisë së saj, të cilën e përshkroi si jashtëzakonisht të rëndë dhe tragjike.
Curri u shpreh se situata shëndetësore e këngëtares kërkon veprime të menjëhershme për të siguruar një përmirësim.
“Pashë që për Parashqevi Simakun ata që ishin pranë saj nuk donin të shihnin realitetin e plotë. Rrethi i vogël dhe miqtë e saj. Situata është shumë më dramatike, gati-gati tragjike, nga sa ka dalë në emisione deri tani. Unë në respekt të tyre kam vendosur të hesht, deri në momentin që duan të thonë diçka vetë. Parashqevi Simaku është një personazh publik dhe njerëzit kanë interes për të,” tha Curri.
Në intervistën e tij, Curri ndau mendimin se ndihma për një njeri të dashur duhet të shkojë përtej mbështetjes së zakonshme.
“Parashqevi Simaku ka probleme shëndetësore serioze, fizike dhe psikike të natyrës shpirtërore. Ka nevojë për mjekim. Unë nuk e di nëse do ta bindin të mjekohet, por dikush duhet ta bëjë. Dashuria për një person nuk shfaqet duke i qëndruar afër, e duke i ofruar ushqim e strehim, por asistencë për ta shëruar. Historia është shumë dramatike dhe tragjike. Dua të rezervohem deri në momentin që njerëzit e saj duan të thonë të vërtetën. Nuk mund të fshihen shumë gjatë sekretet për jetën e saj. Jam i tronditur, ende nuk e kam marrë veten nga ajo vizitë,” përfundoi ai.
