Modelja dhe ish-miss Shqipëria, Françeska Murati, ka ndezur aludimet për një krizë në jetën e saj personale, përmes disa përgjigjeve të sinqerta në rubrikën “Ask me a question” në rrjetet sociale.
E pyetur nga ndjekësit për jetën e saj aktuale, Françeska ka lënë të kuptohet se po përballet me një periudhë të vështirë, megjithëse ka zgjedhur të mos ndajë shumë detaje publikisht.
“Po kaloj një periudhë të vështirë. Nuk është diçka që unë e kam diskutuar haptazi. E dinë vetëm njerëzit e mi të afërt dhe ata që dua. Më kanë ndenjur afër dhe më kanë dhënë shumë dashuri. Jam shumë e ngarkuar. Po mundohem ta kaloj, përballoj. Jeta paska qenë shumë e vështirë. Çdo gjë ndodh për një arsye. Në një moment të dytë do flas hapur t’iu tregoj gjithçka që po ndodh në jetën time,” ka treguar ajo.
Ajo që i ka shtuar më shumë zërat për një ndarje të mundshme me bashkëshortin Ergys Murati, është fakti që fotot me të mungojnë prej kohësh në profilin e saj, ndërsa Françeska ka bërë të ditur se po kërkon një banesë të re për vete dhe djalin e saj, Charlie.
“Jam në kërkim të një shtëpie. Deri tani unë kam jetuar tek shtëpia e prindërve të mi këtu në Tiranë, gjithçka ka qenë super okay, super komode por po vjen vera. Prindërit e mi do të kthehen në Tiranë dhe unë kam nevojë pak për hapësirën time, kështu që kam vendosur të marr shtëpinë time, të kem gjërat e mia, ta arredoj si të dua,” ka shtuar ish-missi.
Ndonëse nuk ka konfirmuar drejtpërdrejt një ndarje, deklaratat e saj kanë nxitur spekulime të shumta në media dhe rrjete sociale, veçanërisht për shkak të mungesës së bashkëshortit në jetën e saj publike kohët e fundit.
