Këngëtari shqiptar, Sabiani, nuk ka ngurruar në asnjë moment të shprehë publikisht dashurinë dhe kujdesin e veçantë që ka për vajzën e tij, Keisi. Ndërsa ditën e sotme ai ka zgjedhur ta urojë vogëlushen e tij me anë të një urimi special për ditëlindjen e saj të 19-të.
“Motra ime e vogël mbush plot 19-vjeç. Sa shpejt nuk po u besoj syve, u harrokan mundimet dhe sakrificat kur të sheh ty të lumtur dhe kaq të bukur. Hap sytë motra ime e vogël, tani je më e madhe, mos iu largo shumë babit. Ke karrierën njëherë, pastaj mendo për të tjerat. Megjithëse karrierën e ke të sigurt, të ka pikturuar i madhi zot vullnetin, e ke të trashëguar nga babi. Kështu që gëzofsh edhe 100 vite të tjera si kjo ditë. Mos harro se je mendimi im i parë kur zgjohem, je frika dhe ankthi im i ditës se ku shkon, çfarë bën. Çdo lëvizje e jotja dua të jetë nën kontroll dhe kështu do jetë në përjetësi. Të dua babo pa kushte, je goca ime e vogël dhe kështu do të jesh kur të dalin edhe thinjat. Të dua princesha ime”, ka shkruar këngëtari bashkangjitur fotos së Keisit të shkëputur nga festa e ditëlindjes, ku shfaqet e veshur me një fustan ngjyrë rozë dhe të përcjell pamjen e një princeshe.
Menjëherë në llogarinë e Sabianit kanë mbërritur të tjera komente nga ndjekës apo miq të tij, të cilët e uronin për këtë ditë speciale të vajzës së tij.
Edhe në dalje publike apo intervista të ndryshme, artisti i njohur ka treguar gjithmonë se Keisi është një nga pikat e tij më të dobëta dhe dashuritë më të mëdha për të cilën kujdeset me shumë se çdo gjë tjetër./revistawho.com
