Një mëngjes i zakonshëm korriku në bregdetin shqiptar u shndërrua në një moment historik për turizmin elitar: super-jahti “Koru”, i përkatësisë së Jeff Bezos, themeluesit të Amazon dhe një prej njerëzve më të pasur në botë, u ankorua në Sarandë – duke tërhequr vëmendjen ndërkombëtare dhe duke e futur Shqipërinë zyrtarisht në listën e vendeve ku pushon bota e fuqishme.
“Koru”, një gjigand i oqeanit me gjatësi 127 metra dhe vlerë marramendëse prej 500 milionë eurosh, nuk është thjesht një anije. Ai përfaqëson filozofinë personale të Bezos-it mbi luksin, teknologjinë dhe estetikën. I ndërtuar nga kompania e mirënjohur Oceanco në Holandë, jahti përmban një ndërthurje të së kaluarës dhe së ardhmes, me dizajn elegant dhe sistem ekologjik të përparuar.
Brenda tij fshihet një botë që pak njerëz kanë luksin ta shohin nga afër:
“Palestra me pamje nga deti, suitat me tavan të lartë dhe arredimi i personalizuar” çdo detaj është menduar me përpikmëri.
Për shumëkënd, ndalesa e Bezos nuk ishte vetëm një kapriço verore. Ajo përbën një sinjal të qartë se Shqipëria po hyn në orbitën e destinacioneve luksoze ndërkombëtare.
Saranda, me bukuritë e saj natyrore, portin gjithnjë e më të frekuentuar dhe ofertën në rritje për turizmin e luksit, tashmë është vënë zyrtarisht në hartën e miliarderëve. Dhe kur një emër si Jeff Bezos shfaqet në horizont, bota e vëren.
