Pas një prej historive më të përfolura të dashurisë në Hollywood, Jennifer Lopez duket se po hyn në një kapitull të ri të jetës së saj. Gati dy vite pas ndarjes nga Ben Affleck, këngëtarja dhe aktorja 56-vjeçare ka folur hapur për mënyrën se si e ka përjetuar këtë periudhë dhe për ndjenjën e re të lirisë që, sipas saj, nuk e kishte përjetuar më parë.
Në një fragment të intervistës së saj për “Nightline”, të transmetuar në “Good Morning America”, Lopez pranoi se sot ndihet më e qetë dhe më e sigurt me veten. “Jam në periudhën time të lumtur. Mendoj se, për herë të parë në jetën time, ndihem sikur jam e lirë; jam më vete. Dhe ndihet vërtet shumë mirë”, u shpreh ajo. Artistja shtoi gjithashtu se kjo periudhë e ka ndihmuar të ndryshojë mënyrën si e sheh veten:
“Kam arritur në pikën ku vërtet i besoj vetes dhe e vlerësoj veten pak më shumë, në vend që të jem kaq e ashpër me veten dhe të përpiqem gjithmonë të provoj veten”.
Megjithatë, rruga drejt kësaj qetësie nuk ka qenë e lehtë. Lopez tregoi se pas ndarjes vendosi të ndalonte gjithçka për t’u përqendruar te familja dhe te vetja. “Kisha nevojë të isha në shtëpi me fëmijët e mi dhe kjo ishte përparësia në atë kohë”, tha ajo, duke shtuar:
“Anulova turnetë dhe thjesht vendosa të rri në shtëpi dhe të përballem me atë që kishte ndodhur, pa ikur prej saj përmes punës, përmes një personi tjetër apo përmes ndonjë gjëje tjetër, thjesht të qëndroj”.
Sot, ndërsa vazhdon “Up All Night” në Las Vegas dhe përgatit projekte të reja, Lopez thotë se ndihet më e fortë dhe më mirënjohëse se kurrë. “Unë jam një artiste skene, një argëtuese dhe një aktore. Një sipërmarrëse. Dhe jam e lumtur. Jam e lumtur. Dhe jam e shëndetshme. Dhe jam mirënjohëse”, përfundoi ajo.
