Drejtuesit e Top Channel kanë vendosur ta spostojnë në verë punën për edicionin e ri të “Big Brother”. Në një artikull të ditës së sotme, gazeta “Panorama” shkruan se sipas burimeve të tyre, flitet për ndryshime të rëndësishme në format, duke u bazuar dhe në shikueshmërinë e këtyre viteve. Produksioni është në diskutime për të sjellë këtë herë një ‘reality show’ me VIP-a, duke menduar të izolojnë në një shtëpi personazhet më të pëlqyer të momentit, shkruan “Panorama”. Në këtë version ndryshe të spektaklit, njerëzit e njohur në fusha të ndryshme do të sfidojnë njëri-tjetrin me anë të pikave më të forta që kanë, në atë çfarë dinë të bëjnë më mirë jashtë skenës. Megjithatë asgjë nuk është e konfirmuar deri tani, përveç faktit që do të ketë ndryshime të forta në spektakël. Sa për moderimin, ende nuk dihet nëse Ledion Liço do të jetë sërish prezantuesi i “Big Brother 9”, pasi ai vetë ka konfirmuar vetëm marrjen përsipër të “Top Awards”.
Jo më “Big Brother me të panjohur, Top Channel do të mbyllë në një shtëpi VIP-at
