Nëse vitet e kaluara dëgjoje më shpesh “Ciao” në rrugët e Tiranës apo në bregdet, këtë verë tingëllon ndryshe. “Bonjour” dhe “Hallo” janë fjalët që të zënë veshin gjithandej. Studentë, të rinj me çanta shpine, çifte që shëtisin nëpër rrugicat e kryeqytetit apo shijojnë kafenë në baret e Sarandës – duket se janë francezët dhe gjermanët ata që po e zbulojnë Shqipërinë si destinacionin e tyre të preferuar.
Sipas të dhënave të INSTAT, Gjermania dhe Franca i kanë marrë stafetën Italisë. Vetëm në periudhën janar–korrik, nga Gjermania kanë hyrë 231 mijë vizitorë, një rritje me 28% krahasuar me një vit më parë. Madje për herë të parë Gjermania është ngjitur në vendin e gjashtë të listës së shteteve vizitore, pas Kosovës, Italisë, Maqedonisë së Veriut, Malit të Zi dhe Greqisë. Operatorët turistikë shpjegojnë se gjermanët vijnë kryesisht si individë, të rinj dhe aventurierë, dhe pritet që ky trend të vazhdojë.
Edhe më i fortë ka qenë “pushtimi” francez: 160 mijë hyrje vetëm në 7 muajt e parë, ose 48% më shumë se vitin e kaluar. “Në numër, Franca ka pasur dhe nivelin më të lartë të rritjes nga të gjithë shtetet me 51 mijë më shumë,” – tregojnë shifrat. Vetëm korriku regjistroi një rritje prej 55% nga turistët francezë, duke treguar se interesi është afatgjatë dhe tashmë po negociohen kontrata edhe për vitin e ardhshëm.
Nga ana tjetër, italianët që gjithmonë e kanë dominuar tregun turistik në Shqipëri, këtë herë duket se kanë humbur terren. Në janar–korrik kanë hyrë 664 mijë italianë, me një rritje modeste prej 4.5%, ndërkohë që një vit më parë zgjerimi ishte plot 47%. Megjithatë, ata mbeten grupi i dytë më i madh i vizitorëve në vend, pas kosovarëve.
Në total, në shtatë muajt e parë të vitit, në Shqipëri kanë hyrë 6.58 milionë të huaj, me rritje vetëm 3.5%, ndryshe nga dinamika e vitit të kaluar që ishte shumë më e fortë. Por një gjë është e sigurt: këtë verë, Shqipëria ka fituar dy miq të rinj – francezët dhe gjermanët.
