Eugent Bushpepa është një nga këngëtarët shqiptarë që me muzikën e tij ka ditur gjithmonë të përcjellë mesazhe për publikun.
Një rocker me zërin e fuqishëm e individualitet artistik, por dhe me një shpirt të bukur dhe fisnik.
Dëshmi e kësaj është dhe bashkimi i tij me kauzën e fëmijëve me aftësi të kufizuar, duke iu bashkuar World Vision si ambasador për programin social “Tungjatjeta… Jetë”.
Jo vetëm kaq, por ai ka vendosur të udhëtojë në zonat ku “Tungjatjeta”, ka marrë jetë, duke takuar Emanuelin e vogël, në fshatin Skroskë të Librazhdit, i cili është një ndër 35 fëmijët që merr shërbime të specializuara falas në shtëpi nga ekipi i “Tungjatjetës”!
Emanueli ishte vetëm 3 muajsh kur u diagnostikua me encefalopati. Sot ai është 4 vjeç dhe nuk mundet as të flasë, as të ecë e as të qëndrojë ulur. Ai jeton me nënën e tij Mirën, motrën Gentën 2-vjeçare në një shtëpi shumë të vjetër (që një banor i fshatit u tregua zemërgjerë dhe ua la për të jetuar). Babai i Emanuelit sa herë mundet shkon në Greqi për të punuar, por vogëlushi ka nevojë për seanca të rregullta fizioterapie dhe logopedie.
Genti ka një mesazh për shqiptarët dhe Shqipërinë. Këta fëmijë kanë nevojë për shërbime, për dashuri, për mbështetje dhe nuk mund të vazhojme të qëndrojmë indiferent. Nesër mund të jetë shumë vonë…
Emanueli është një prej 70,000 fëmijëve në vend fëmijëve që janë me aftësi të kufizuar. Vetëm 8 % e tyre marrin shërbimet bazë.
