Nga: Xhuljana Lakuta Fotot: Fatjon Kapllanaj Dekor: Sara Event
Televizioni është gjithmonë një tundim, kështu është konsideruar të paktën për këdo që e ka shkelur të paktën vetëm njëherë, ose e ka ndjekur përherë me kërshëri nga shtëpia duke imagjinuar se si do të dukej para “syrit magjik” të kamerave.
Kush e ka provuar thotë se është e vështirë të shkëputesh nga ai ndriçim, njëjtë si Joana Grabolli. Vajza me titullin e “Miss World”, që mes shumë punësh e impenjimesh ka vendosur ta mbajë kurorën siç i takon e në të njëjtën kohë mos të heqë dorë nga ëndrra për të qenë stomatologia më e mirë e ardhshme.
Të zgjedhësh mes dy rrugësh ndonjëherë bëhet e vështirë, ose i merr më të mirën të dyjave për t’i shijuar siç do doje ti… ashtu si Joana ka vendosur në pasionin e saj për televizionin dhe stomatologjinë.
Nga njëri skaj në tjetrin, vajza e shkencave vihet përballë pyetjeve, pa ndriçimin e kamerave, duke u bërë gati për rrugën që aspiron, për të na treguar më shumë se si ka qenë gjithë eksperienca deri më tani, çfarë shije e dëshirash i ka lënë televizioni dhe stomatologjia… Joana Grabolli vjen në intervistën e parë për Revistën Who duke iu përgjigjur me delikatesën e një stomatologeje çdo pyetje për të cilën do ishit kuriozë…
Joana, pas kurorës në “Miss world”, modelingut dhe një emisioni sportiv në “Abc News”, na trego pak, çfarë ka ndodhur me ty më pas ?
Pas këtyre eksperiencave unë jam shkëputur nga televizioni, modelingu dhe jam fokusuar më tepër në përfundimin e studimeve. Këtë vit i përfundova me sukses dhe po vazhdoj praktikën si stomatologe.
Kur një vajzë e bukur dhe e njohur ka në duar edhe një kurorë, edhe një këmbë në ekran edhe një diplomë që i siguron një profesion shumë të rëndësishëm, kë është e prirur të zgjedhë?
Ahh kjo është një pyetje, të cilën unë ia bëj dhe vetes shpesh… Profesioni të bën të mendosh për një të ardhme më të sigurt, por dashuria për ekranin nuk më është shuar edhe pse kam qenë larg këto kohët e fundit. Mendoj që pranë kësaj dileme gjendet çdo miss, duke qenë se para kurorës mund të ketë zgjedhur një profesion tjetër dhe kur vjen kurora absolutisht që bota e televizionit të tundon.
A janë dritat e studiove dhe skenave një tërheqje më e fortë sesa dritat e një klinike?
Mendoj që për shumicën e femrave dritat e studiove e bëjnë të mendojë që po shkëlqen.
Tani që ke mbaruar planet e tua profesionale, shkollën dhe je diplomuar je gati për të eksperiencë të re televizive?
Po jam gati për eksperiencë të re televizive dhe jam duke parë disa mundësi për sezonin e ri televiziv në shtator.
Kë do zgjidhje nëse do vendoseshe para një vendimi?
Gjithmonë jam përpjekur t’u dedikoj kohë të dyjave, duke u angazhuar në periudha të caktuara me shumë te njëra apo tjetra, kur ka qenë nevoja. Nëqoftëse duam, gjithmonë e gjejmë kohën dhe mundësinë për gjërat që duam.
Për të pasur edhe ne një “recetë motovimi”, çfarë i thotë një miss vetes para pasqyrës?
Një miss para pasqyrës e adhuron veten e saj, buzëqesh dhe pranon dhe defektet e saj duke i zbukuruar me vetëbesim.
Kur je një personazh i njohur, në të njëjtën kohë fama të sjell edhe kuriozitetin, sidomos për jetën private. Ti je në grupin e atyre që jetën private e ke private apo e lë edhe ndonjë shteg të hapur?
Deri më tani kam preferuar ta mbaj private, nëqoftëse do më pëlqejë të ndaj diçka nga jeta ime private do ta bëj, pse jo.
Çfarë roli ka luajtur familja jote në rrugën tënde?
Familja ime është e lumtur që unë s’e kam lënë anash shkollën asnjëherë dhe pse kam pasur angazhime të tjera, kanë besim te unë tashmë që do di ta ndaj kohën midis pasioneve dhe profesionit.
Na shuaj një kuriozitet, meqë jemi para një dentisteje të ardhshme, a janë dhëmbët tipari i parë që sheh kur një djalë të afrohet?
Tipari i parë që shoh është gjatësia, dhëmbët vijnë të dytat. Si dentiste e ardhshme i vë shumë re dhe dhëmbët.
E vërtetë? Po/Jo
Një miss ushqehet me gjethe sallate që të mos marrë kile…
Jo kaq drastike, kujdes i shëndetshëm.
Një miss e ka jetën më të thjeshtë se një vajzë e zakonshme…
Jo nuk është e vërtetë.
Një vajzë e bukur është përherë e paragjykuar…
Po, shumë e vërtetë.
Një miss është gjithmonë me vonesë sepse qëndron shumë para pasqyrës…
Jo miss-et mësohen me korrektësi.
Një miss është gjithmonë në kohë sepse nuk ka nevojë të zbukurohet…
Merr kohën e saj si gjithë vajzat.
Një miss i ble rrobat një masë me të vogël që të duket sa më elegante… Po, e vërtetë.
Një miss duhet të jetë përherë miss…
Po e vërtetë, sepse titulli mbetet gjithmonë./revistawho.com
