Mbrëmjen e djeshme, Jonida Maliqi ishte e ftuar speciale në emisionin ‘TempOra’ në televizionin ‘Ora News’. Këngëtarja e njohur ka zbuluar disa detaje të reja në lidhje me performancën e saj në festivalin europian të këngës. Jonida do të përfaqësojë Shqipërinë me këngën ‘Ktheju Tokës’ dhe siç duket ka filluar të mendojë në detaje për performancën skenike.
“Do jem e vetme në skenë, sigurisht me back vokalet. Nuk do kem performancë me koreografi. Po punojmë shumë për pjesën vizuale, grafike. Do e këndoj shqip, nuk do ndryshoj asgjë përveç disa parametrave që i kërkon ‘Eurosong’. Të hënën nisemi në Suedi për të realizuar audion dhe ‘mastermix-in’ e këngës. Jam shumë entuziaste”, – ka treguar këngëtarja. Jonida ka shtuar se sa herë e këndon këngën ndihet si në një dimension tjetër, njësoj si të prekë qiellin dhe të zbresë prapë në tokë. Ajo është shprehur shumë e sigurt për prezantimin e saj në ‘Eurovision’. Jonida do të këndojë në datë 16 maj në gjysmëfinalen e dytë të ‘Eurovision’. /revistawho.com
