Një ngjarje shqetësuese u regjistrua gjatë transmetimit live të spektaklit Big Brother Albania, ku një ish-banor i shtëpisë, Jozi, ndërmori një akt fizik ndaj Gjestit në momentin e largimit nga shtëpia. Ky episod u pa në kohë reale nga publiku shqiptar dhe nxiti reagime të menjëhershme.
Top Channel, televizioni që transmeton këtë format, ka reaguar me një deklaratë të prerë, duke dënuar çdo formë dhune dhe duke nënvizuar vlerat mbi të cilat ndërtohet programi:
“Një akt i dhunshëm, i papranueshëm dhe thellësisht shqetësues ndodhi në një moment që duhet të ishte fundi i një përvoje, jo fillimi i një reagimi të tillë. Kjo sjellje nuk përfaqëson vlerat e Top Channel dhe as ato të Big Brother Albania,” – u shpreh prezantuesi Ledion Liço menjëherë pas incidentit.
Në deklaratë, theksohet se veprimi ishte i papritur dhe nuk kishte asnjë sinjalizim paraprak nga ana e produksionit.
“Ky incident nuk ishte i organizuar, i nxitur apo i parashikueshëm nga produksioni. Realiteti i një formati live mbart të papritura, por kjo nuk e justifikon kurrë dhunën,” – vijoi Liço.
Sipas burimeve nga produksioni, Jozi është përjashtuar menjëherë nga çdo pjesëmarrje e mëtejshme në program dhe është dorëzuar tek autoritetet përkatëse, ku ndaj tij janë ndërmarrë procedurat përkatëse ligjore. Gjithashtu, janë në proces rishikimi të gjitha protokollet e sigurisë dhe transmetimit për të shmangur përsëritjen e rasteve të tilla.
Top Channel ka shprehur angazhimin e tij për të bashkëpunuar ngushtë me organet përgjegjëse dhe për të mbajtur publikun të informuar për çdo zhvillim të ri, duke theksuar se prioritet mbeten siguria e pjesëmarrësve dhe integriteti i përmbajtjes që u ofrohet shikuesve.
