Aktori i njohur Julian Deda, ka ndarë me ndjekësit e tij në rrjetin social “Facebook” keqardhjen për prodhimet e “Top Channel” që sipas Dedës çdo ditë e më shumë përfliten për keq. Në statusin kushtuar “Top Awards”, të cilin siç pohon vetë nuk e ka ndjekur, Juli thotë se përmes asaj që ka lexuar ka arritur të kuptojë që eventi ka dështuar. “Unë nuk e pashë mbrëmë ‘Top Awards’, por po ndjek me vëmendje të gjitha lajmet dhe statuset në lidhje me të. Në gjithë këtë mori komentesh, bie në sy dështimi i eventit. Madje një pjesëmarrës shkruan: “Parada e djeshme me veshje të shtrenjta dhe shtirje masive në ‘Top Awards’ në mes të varfërisë ekstreme, ishte tamam ‘Pordhë me rigon'”. Në fakt, ajo që më shqetëson nuk është se si doli spektakli mbrëmë, sepse kjo është punë e tyre, por më vjen keq që prodhimet e atij kanali përfliten përditë e më keq. Dikur nuk ndodhte kjo. Dikur aty çdo gjë shkëlqente dhe sigurisht çdo reagim ishte pozitiv”, – përfundon ai.
