Shtatë vjet pasi skandali seksual i rrëzoi karrierën, Kevin Spacey është rikthyer në qendër të vëmendjes me një rrëfim të sinqertë dhe të trishtë për gjendjen e tij aktuale. Në një intervistë të fundit për “The Telegraph”, aktori që ka fituar dy Oscar flet hapur për faktin se sot nuk ka më një vend që e quan shtëpi.
“Unë fjalë për fjalë nuk kam shtëpi, jetoj në Airbnb dhe hotele”, deklaroi Spacey, duke treguar se jeta e tij është kthyer në një seri zhvendosjesh të vazhdueshme, aty ku i shfaqet rasti për punë. Ai pranoi se financat e tij janë tkurrur tej mase gjatë viteve të krizës. Sipas tij, edhe pse nuk përfundoi në falimentim, kostot e jashtëzakonshme të shtatë viteve të fundit “e gërryen çdo kursim”, ndërsa projektet e pakta që i ofroheshin nuk mjaftonin për të stabilizuar situatën.
Aktori shtoi se ndikimi i “kulturës së anulimit” e la të izoluar profesionalisht dhe ekonomikisht, duke e detyruar të niste çdo gjë nga e para. Siç e përshkroi vetë: ndjehej sikur “kishte kaluar sërish në pikën zero”, duke u endur nga një punë në tjetrën, pikërisht si në fillimet e karrierës.
Dikur i vendosur në një rezidencë të përhershme në Baltimore, sot Spacey thotë se “të gjitha sendet i ka në magazinë”, derisa të arrijë të sistemojë veten diku në mënyrë afatgjatë.
Që nga viti 2017, mbi 30 burra e kanë akuzuar publikisht aktorin për sjellje të papërshtatshme ose sulm seksual , vala që nisi pas deklaratës së Anthony Rapp. Pas publikimit të akuzave, Netflix reagoi menjëherë duke e larguar nga “House of Cards” dhe duke përfunduar serialin pa praninë e tij.
