Pak ditë më parë, aktori i njohur Agron Llakaj humbi të shoqen, pas një beteje të gjatë me një sëmundje të pashërueshme. Ai ka zgjedhur sot që përmes një video-mesazhi të falënderojë të gjithë ata që e kanë ngushëlluar.
“Të dashur miq, në pamundësi për t’ju kthyer përgjigje të gjithë mesazheve të drejtuara drejt meje dhe familjes sime me rastin e humbjes së jetës së njeriut të shtrenjtë, Kostandinës tonë dhe Konstandinës time, unë po ju drejtohem me këtë videomesazh duke shprehur falënderimet dhe mirënjohjen e thellë për çdo fjalë zemre. Dihet, edhe gëzimet dhe hidhërimet ndahen me njerëz të njohur dhe të panjohur. Moria e njerëzve në përcjelljen e Konstandinës, por edhe në ditët e pritjes, gjithë kjo dashuri e madhe njerëzore na bëri që ta kalonim disi më lehtë. Mali i dhimbjes që Konstandina la mbrapa nuk ka fjalë që mund ta shprehin sepse pesha është shumë e madhe. Pikërisht për shkak të kësaj dhimbjeje, ne po pranojmë vuajtjen. Kam lexuar mesazhet tuaja për të ruajtur kujtimet e saj, por ajo është në çdo frymëmarrje tonën, timen, fëmijëve, mbesës dhe nipërve të mi dhe gjithë njerëzve të dashur. Por, jetën nuk e zgjedhim, e tillë është. Në dy vite ajo tregoi se ishte trau dhe shtylla e shtëpisë, por edhe një njeri i fortë. Në dy vite në këtë tragjedi njerëzore dhimbjeje, në këtë betejë me një sëmundje të pamëshirshme ishte ajo që më dha mundësinë të ushtroja profesionin tim. Të bësh humor me thikë në zemër është e vështirë, motiv ishte Konstandina. Pas gjithë kësaj beteje, ne e pranuam humbjen. Sëmundja doli më e fortë. Ajo çka Konstandina la mbrapa, unë shpresoj që fëmijët e mi ta trashëgojnë, bashkë me respektin dhe dashurinë njerëzore. I prekur dhe i emocionuar nga e gjithë pjesëmarrja e njerëzve dua të shpreh falënderimin e madh dhe t’ju them: Duajeni njëri-tjetrin, respektojeni. Pasuria më e madhe është shëndeti, para tij, jetës dhe njerëzve të dashur çdo gjë tjetër është shumë e vogël. Respekt dhe mirënjohje nga unë, fëmijët e mi, nipërit dhe mbesa”, ka thënë ai.
