Futbollisti i Borussia Dortmund, Karim Adeyemi, është rikthyer në qendër të vëmendjes pasi skandali i gjobës prej rreth 450 mijë eurosh vazhdon të komentohet gjerësisht. Pas ditësh heshtjeje, partneri i Loredanës ka vendosur të japë versionin e tij, duke pranuar publikisht gabimin që e ka vendosur nën dritën e kritikave.
Sipas raportimeve në media, çështja nisi pas një porosie online që rezultoi të përmbante mjete të ndaluara nga ligji gjerman. Bëhej fjalë për një “Mystery Box” të marrë nga platforma të errëta të internetit, një zgjedhje që ai sot e quan “vendim fatal nga pakujdesia”.
Në ‘Instastory’-n e tij, Adeyemi tregon se pakon e kishte porositur në fillim të vitit 2024, por ajo kishte mbërritur shumë muaj më vonë dhe në mënyrë të pazakontë, kishte përfunduar direkt në duart e policisë pa u hapur.
Futbollisti pranon se nuk e kishte kuptuar seriozitetin e situatës deri kur hetimi u bë publik dhe thotë se ndikimi moral ka qenë më i rëndë se ai financiar.
“Ishte një gabim i madh. Më vjen shumë keq dhe e ndiej thellë pendesën. Jam një figurë publike dhe duhet të jem shembull, këtë herë nuk e kam përmbushur.” shkroi ai.
Ai shton se kjo ngjarje i ka shërbyer si mësim, sidomos përsa i përket përgjegjësive që mbart përballë një audience të re e të ndjeshme si të rinjtë.
Në përfundim të reagimit të tij, Adeyemi u shpreh mirënjohës ndaj atyre që i kanë qëndruar pranë dhe siguroi se situata nuk do të përsëritet.
