Stenaldo Mëhilli ka treguar një anë shumë personale të vetes gjatë një bisede të sinqertë me Stinen, ku ka ndarë me publikun një nga përjetimet më të thella emocionale të jetës së tij. 28-vjeçari foli hapur për një dashuri të madhe që kishte përjetuar, një ndjenjë aq e fortë sa, sipas tij, e kishte larguar nga çdo gjë tjetër përreth.
Ai rrëfeu se në atë periudhë ishte tërësisht i përfshirë nga emocionet, deri në atë pikë sa humbiste orientimin dhe nuk i kushtonte më rëndësi asgjëje tjetër përveç ndjenjës që po jetonte.
Stenaldo ndau edhe një moment domethënës nga ajo kohë, gjatë një udhëtimi me tren: “Kam qenë shumë i dashuruar me një vajzë… po kthehesha një ditë me tren, nga ata të shpejtët, dhe po kaloja nga Boni. Ishte një tren dykatësh, me kabina. Rastisa në një kabinë me një zotëri dhe nisëm të bisedonim gjatë,” tregoi ai.
Ajo që e bën këtë histori edhe më prekëse është gjendja e tij emocionale në atë moment. “Isha aq i dashuruar sa nuk më interesonte asgjë tjetër, as ku hipja, as ku zbrisja, as çfarë po ndodhte përreth,” u shpreh Stenaldo, duke nënvizuar se ndjenjat e forta kishin lënë në hije çdo mendim racional.
