Kastro Zizo ka vendosur të flasë hapur për një kapitull të vështirë të jetës së tij, duke bërë një reflektim të rrallë publik mbi sjelljen e vet në një marrëdhënie të shkuar. I ftuar në emisionin “Mirëmbrëma Yje” të Arbana Osmanit, artisti tregoi një anë shumë personale, larg imazhit publik që zakonisht shfaqet në media.
Ai pranoi se gjatë asaj periudhe kishte adoptuar modele sjelljeje që sot i konsideron të papranueshme, duke theksuar se, edhe pse nuk kishte ushtruar dhunë fizike, kishte qenë thellësisht i përfshirë në dhunë verbale dhe kontroll emocional.
“Vitin e parë pas ndarjes kam qenë shumë i keq. Kam qenë një burrë tipik nga ata që shfaqen në emisionet sociale, ku gratë e dhunuara flasin për partnerët e tyre. Isha larg dhunës fizike, por shumë pranë dhunës verbale. Kam qenë dhunues dhe përndjekës në atë kohë,” rrëfeu ai, duke ndarë për herë të parë publikisht këtë pjesë të jetës së tij.
Më tej, Zizo tregoi se, edhe pasi marrëdhënia kishte marrë fund, ai vazhdonte të kërkonte llogari, pavarësisht se paralelisht kishte krijuar disa lidhje të tjera, një sjellje që sot e sheh si shkatërruese.
“Kërkoja llogari në llumin që isha. Kjo gjendje zgjati një vit dhe sot, kur e kujtoj veten e asaj kohë, e përçmoj,” shtoi me tej Kastro Zizo.
