Mbrëmja e “Darkës së të Nominuarve” solli një nga momentet më të diskutuara të javës në BBVK, teksa në qendër të vëmendjes u vendosën sërish Hygerta dhe Nailiri. Prej ditësh, banorët dhe rrjetet sociale janë përfshirë nga aludime për një pëlqim të fshehur, por për herë të parë u fol hapur për të, në prani të të gjithëve.
I vendosur përballë pyetjes së drejtpërdrejtë, Nailiri zgjodhi të përgjigjej me ironi, duke ndezur edhe më shumë kuriozitetin:
“Kam turp t’ia shpreh në sy. Nga respekti që kam për ty, thjesht kam zor me ta thënë në sy,” tha ai, duke sqaruar se çdo ide për pëlqim ka lindur nga interpretimet e Albës, jo nga ndonjë deklaratë e tij.
Megjithëse ky shpjegim synonte të shuante zërat, mënyra se si u tha krijoi edhe më shumë konfuzion. Publiku dhe banorët mbetën të ndarë mes “ai thjesht po bënte humor” dhe “ai po thotë të kundërtën në mënyrë indirekte”.
Edhe Hygerta u ftua të jepte mendimin e saj. Ajo, pa u përfshirë në dramat e momentit, reagoi me qetësi:
“Unë mendoj se e ka thënë në kuptimin e femrës së pjekur.”
Koment që u lexua si një përpjekje për ta mbajtur atmosferën të ekuilibruar, ndonëse situata tashmë kishte marrë drejtim krejt tjetër.
