Një tjetër kthesë në identitetin e artistit që nuk ndalet së surprizuari. Ye – më parë i njohur si Kanye West – ka bërë sërish një ndryshim në emrin e tij ligjor. Pasi në vitin 2021 zëvendësoi emrin e plotë me thjesht “Ye”, këtë herë ai ka shkuar edhe më tej: dokumentet e reja tregojnë se emri i tij tani është “Ye Ye”.
Sipas Page Six, ky ndryshim u bë i ditur përmes dokumenteve të reja ligjore që lidhen me kompanitë e tij si Yeezy Apparel, Getting Our Dreams Inc. dhe Yeezy Record Label, LLC – ku “Ye Ye” figuron si menaxher ose anëtar.
Këto dokumente janë depozituar nga drejtori financiar i tij, Hussain Lalani, në Kaliforni. Deri tani, vetë artisti nuk ka komentuar publikisht për këtë veprim – të paktën jo ende.
Ndërkohë, për fansat e Ye, ky është një hap tjetër në rrugëtimin e gjatë të artistit drejt një identiteti të ri. Që nga viti 2018, kur ai deklaroi: “Zyrtarisht i njohur si Kanye West. Unë jam YE”, ndryshimet në imazh dhe emër janë bërë pjesë e narrativës së tij personale.
Në fillim të këtij muaji, ai shkroi: “Më në fund do të ndaloj së përdoruri Twitterin @kanyewest sepse emri im është Ye”.
Në mars 2024, shefi i stafit të tij Milo Yiannopoulos publikoi një letër ku kërkonte që mediat të mos e quanin më “Kanye West”, duke e cilësuar si “emrin e tij skllav”. Letra theksonte se ai e kishte lënë përgjithmonë pas atë identitet.
Ndërsa ndryshimi i fundit ende nuk është shoqëruar me një deklaratë zyrtare nga vetë Ye, një gjë është e qartë: ai nuk ndalet së ri-shpikuri.
