Këngëtarja 41-vjeçare Katy Perry dhe ish-kryeministri kanadez Justin Trudeau, 53 vjeç, duket se po e shijojnë në maksimum romancën e tyre të re. Dyshja u shfaqën për herë të parë publikisht si çift të shtunën, më 25 tetor, në Paris, ku morën pjesë në një shfaqje kabareje në “Crazy Horse”, për të festuar ditëlindjen e këngëtares, sipas TMZ.
Në fotot e publikuara, Perry dhe Trudeau shihen duke dalë nga teatri dorë për dore, me buzëqeshje në fytyrë. Këngëtarja kishte zgjedhur një fustan elegant të kuq, ndërsa Trudeau ishte veshur në të zeza, për një mbrëmje romantike në kryeqytetin francez.
Thashethemet për lidhjen e tyre nisën gjatë verës, kur të dy u panë bashkë në Montreal, pak pasi Perry ishte ndarë nga ish-i fejuari, aktori Orlando Bloom. Nga ana tjetër, Trudeau u nda nga bashkëshortja Sophie Grégoire në vitin 2023, pas 18 vitesh martesë.
Muaj më vonë, çifti u fotografua sërish në shtator, duke shkëmbyer përqafime dhe puthje në një jaht pranë Santa Barbarës. Burime për People thanë se Trudeau “e kishte ndjekur me këmbëngulje” këngëtaren dhe se mes tyre ekziston “një lidhje e lehtë dhe respektuese”.
Aktualisht, Perry ndodhet në turneun botëror “Lifetimes Tour”, me të cilin po promovon albumin e saj më të ri, 143. Turneu nisi në Meksiko Siti dhe ka përfshirë ndalesa në SHBA, Kanada dhe Australi, ndërsa këngëtarja vazhdon të udhëtojë për t’u takuar me fansat në mbarë botën.
