Bashkëshortja e këngëtarit të njohur shqiptar, Françesk Radi, po përgatit një libër për jetën e tij, ku do të përmbledhë momente interesante të karrierës gjatë viteve ‘70, si dhe materiale rreth rinisë. Libri do të përmbajë dhe disa kujtime të 3 miqve dhe bashkëpunëtorëve të Françeskit. Njëri prej tyre, Shpend Sollaku Noé, ka zbuluar diçka që ka ndodhur me këngëtarin e njohur italian, Adriano Celentano. Ai kishte pasur rastin ta takonte rreth fundit të viteve ’90 dhe i kishte treguar atij këngën ‘Susanna’ të kënduar nga Françesk Radi, ndërsa reagimi i tij ishte epik. “Më ra rasti, dikur, andej nga fundi i viteve ’90, tʼi jepja të dëgjonte Adriano-s një ‘cover’ tjetër të këngës ‘Susanna’, të interpretuar më parë në italisht po prej Celentano-s. Ai, sipas mënyrës së vetë, komentoi: ‘Po ky jam unë, domethënë, duhet të jem unë, domethënë, nuk jam unë, por një që më duket më mirë sesa të isha unë’. I tregova se këngëtari që po dëgjonte ishte shqiptar, që quhej Françesk Radi, një kantautor i shquar, që edhe e kish pësuar prej muzikës së tij në kohën e diktaturës. I premtova që t’i dërgoja një CD të plotë të Françeskut tonë, porsa të më binte në dorë”, u shpreh miku i këngëtarit. Kujtojmë se Françesk Radi ka dhënë shumë për muzikën shqiptare për vite me rradhë, por u nda nga jeta në 3 prill të vitit 2017./revistawho.com
