Reperi i Babastars, Cozman ka publikuar projektin e tij të parë solo, “Si Dje” që u përshkua nga një sukses i jashtëzakonshëm. Për një ditë reperi arriti gjysëm milionë klikime me këngën që nga teksti prekës u konsiderua si dedikim për Tunën. I kontaktuar nga “Telegrafi”, Cozy nuk hezitoi të përgjigjet në disa pyetje sa i përket projektit të fundit. I pyetur se nëse projekti është dedikim, ai u përgjigj duke u buzëqeshur “Ndoshta…”. I pyetur për raportin e tij me Tunën, ai tha se nuk dëshiron të flasë për jetën private, duke lënë të kuptohet se diçka ka ndodhur mes tij dhe këngëtares. Në portale doli një raportim ku shihej se si menaxheri i Tunës kërkoi nga promoterët e koncerteve që në poster reperi të diskriminohej duke dalë me emër dhe foto më të vogël se sa Tuna, e për këtë ai po ashtu u shpreh shkurt. “I kam përcjellë të gjitha zhvillimet me vëmendje. Unë respektova marrëveshjen dhe isha në koncert. Ishte një mbrëmje shumë e mirë. E falenderoj publikun shqiptar të Zvicrës. Sa i përket fotove të publikuara nga pronari i diskotekës, nuk kam çka të shtoj. Secili person le t’i bartë konseguencat dhe le t’i ketë gjërat në ndërgjegjen e vet. Unë bëra atë që duhej bërë, shkova në koncert dhe respektova njerëzit që erdhën për të më dëgjuar”, theksoi Cozy. Ai në fund falënderoi fansat e tij dhe të Babastars për përkrahjen nga projekti “Si Dje”, që për të ka arritur pritjet që i ka pasur. “Falenderoj Getin dhe Majkin, ashtu sikurse edhe Kicon që punuan bashkë me mua në këtë këngë. Projekti ka marrë shumë përkrahje dhe jam i nderuar për këtë e shumë falenderues”, përfundoi ai. (Telegrafi)
