Nëse kthehemi pas në kohë do të bëhemi paksa nostalgjikë dhe do të na kujtohen këngët e disa personazheve publikë, që dikur e nisën rrugëtimin e tyre në muzikë, por sot janë tërhequr nga kjo fushë. Bëhet fjalë për spikerët radiofonikë, të cilët që në fillim të viteve 2000 kanë provuar muzikën dhe kanë pasur aq shumë sukses sa këngët e tyre ende sot dëgjohen dhe i bëjnë të gjithë të kërcejnë e këndojnë njëzëri.
Julka Gramo një spikere në radio tashmë, solli dikur disa nga këngët më të dëgjuara, një ndër to dhe ‘Amin’, e cila u bë një hit asokohe. Julka solli dhe këngë si ‘Kurrë mos thuaj jo’ apo ‘Ekzistoj’, që u kthyhen padyshim në këngët më të dëgjuara të atyre viteve.
Gerta Heta është gjithashtu një tjetër spikere në radio, e cila solli këngën ‘My love’ dhe ‘Lamtumire’. Të 2-ja këto këngë u renditën ndër më të preferuarat e publikut në periudhën kur u lançuan.
Julka dhe Gerta tashmë janë larguar nga muzika, duke u zhvendosur në radio, megjithatë mund të themi se vajzat janë sërish pranë muzikës. Ndoshta një rikthim i tyre me një projekt muzikor do t’i gëzonte shumë fansat, një pjesë e mirë e të cilëve janë rritur me muzikën e tyre./revistawho.com
