Këngëtarja e njohur e grupit En Vogue, Dawn Robinson, ka ndarë me fansat e saj një detaj të pazakontë të jetës së saj. Ajo ka zbuluar se ka jetuar në makinën e saj për tre vitet e fundit.
Në një video të shpërndarë në YouTube, Robinson, 58 vjeçe, e ka thënë: “Kam jetuar në makinën time për tre vitet e fundit.”
Vendimi për të jetuar në makinë erdhi pas një shpërnguljeje të vështirë që Dawn kishte bërë nga prindërit e saj në Las Vegas në vitin 2020. Ajo shprehet se fillimisht gjithçka dukej mirë, por situata u përkeqësua shpejt.
“E dashurova fillimisht, por pastaj nuk ishte siç e prisja. Nënën time e dua shumë, por pas disa mosmarrëveshjeve të forta, e kuptova se nuk mund ta përballoja më.”
Pas një muaji qëndrimi në makinën e saj, një menaxher i saj e bindi për t’u kthyer në Los Anxhelos, ku ai i sugjeroi të qëndronte me të. Por, kur mbërriti, Dawn zbuloi se nuk kishte vend për të. Ajo kaloi tetë muaj në një hotel dhe përpiqej të gjente një apartament, por çdo mundësi që ajo shqyrtonte ishte refuzuar nga menaxheri i saj.
Në kërkim të një zgjidhjeje, këngëtarja filloi të shikonte video në YouTube për ata që jetonin në makina dhe gjeti këtë mundësi si një rrugëdalje nga vështirësitë.
