Këngëtarja shqiptare me karrierë në Shtetet e Bashkuara të Amerikës, Rinesa, e njohur për publikun si Rinesance, ka prekur ndjekësit me një rrëfim në rrjetet e saj sociale. Ajo ka ndarë për herë të parë luftën e saj me një tumor në tru. Rinesa tregoi se prej dy muajsh po përballet me probleme serioze shëndetësore.
Pas ekzaminimeve, ajo u diagnostikua me tumor në tru dhe iu nënshtrua dy operacioneve delikate. Aktualisht, Rinesa ndodhet në një qendër rehabilitimi, ku pritet të fillojë terapinë radiologjike.
“Deri para do jave s’e kom ditë çka po ndodh… Mënyra se qysh ka rrjedhë gjithçka osht bekim n’vete për mu… Muzika është motivi për me e kalu edhe këtë sfidë”, shkroi ajo, duke shprehur mirënjohjen për familjen, ekipin dhe bashkëpunëtorët që i kanë qëndruar pranë në këtë periudhë të vështirë.
