Në vitin 2014 një vajzë me talent të veçantë dhe zërin potent arriti të tërhiqte vëmendjen e dashamirësve të muzikës në ‘Eurovison Song Contest’. Pavarësisht se në skenën muzikore shqiptare nuk është shumë e pranishme, Hersi Matmuja po ndërton karrierën e saj në shtetin fqinj, Itali.
Tashmë ajo i është përkushtuar totalisht muzikës klasike, pasionit të saj më të madh. Angazhimet e Hersit në këtë zhanër muzikor kanë qenë të shumta dhe së fundmi një lajm i mrekullueshëm vjen nga brigjet përtej Adriatikut. Së bashku me disa nga emrat më të njohur të muzikës klasike, këngëtarja shqiptare do të risjellë në Bienalen e Vencias këngën e një nga kryeveprave të filmave të viteve 1920, “Il Golem – Come venne al mondo”.
Ky film është përzgjedhur për të hapur mbrëmjen e “Festivalit Internacional të Filmit” në 28 gusht. “Il Golem” do të paraqitet në një verision të restauruar duke qenë se mendohej se kopja origjinale e tij kishte humbur që pas shfaqjes në 1920. Për të risjellë muzikën origjinale të filmit, do të jenë dy artistë shqiptarë, Maestro Admir Shkurtaj dhe përkrah tij Hersi Matmuja, që do të ketë rolin e sopranos. Ky është me të vërtetë një sukses i jashtëzakonshëm për artistët shqiptarë dhe është e sigurt se emri i Hersit do të renditet ndër këngëtarët më të mirë të muzikës klasike. /revistawho.com
