Një valë zemërimi ka përfshirë opinionin publik në Itali, pasi një koment shqetësues u publikua në rrjetet sociale, ku një përdorues i Instagram-it, i identifikuar si punonjës në Ministrinë e Arsimit dhe Meritës, bëri një krahasim tragjik midis vajzës së kryeministres Giorgia Meloni, Ginevra, dhe Martina Carbonaro-s, një vajzë e re e vrarë nga i fejuari i saj në qytetin Afragola.
Mesazhi u bë publik nga partia Fratelli d’Italia përmes një postimi në platformën X, duke e dënuar ashpër si një akt “horror” dhe një shprehje “të papranueshme të urrejtjes politike që po kalon çdo kufi njerëzor dhe institucional”.
Reagimi i Giorgia Melonit nuk vonoi. Kryeministrja e cilësoi mesazhin si dëshmi e një klime të rënduar shoqërore që tejkalon politikën:
“Kjo nuk është përballje politike. Nuk është as zemërim. Është diçka më e errët që tregon një klimë të sëmurë, një urrejtje ideologjike, ku gjithçka duket e lejueshme, madje edhe të urosh vdekjen e një fëmije për të goditur një prind. Politika duhet të dijë të bashkohet për të refuzuar këtë klimë të dhunshme. Ekzistojnë kufij që nuk duhen kaluar kurrë”, shkruajti Meloni.
Edhe motra e saj, Arianna Meloni, zyrtare pranë Fratelli d’Italia, reagoi me tone të ashpra në rrjetet sociale:
“Deri kur duhet të durojmë? Deri ku duhet të shkojmë? Përballë kësaj barbarie të neveritshme, ndjejmë gjithë zemërimin e mundshëm. Dënimi duhet të jetë unanim dhe i fuqishëm. Giorgia-s dhe Ginevra-s, përqafimi im më i ngrohtë dhe mbrojtës”, deklaroi ajo.
Ndërkohë, Ministri i Arsimit Giuseppe Valditara konfirmoi se janë nisur hetimet për të identifikuar autorin e këtij mesazhi tronditës.
“Shpreh solidaritetin tim për Kryeministren Meloni dhe të afërmit e saj. Ky është një akt i padenjë dhe i papranueshëm. Autoritetet do të marrin masa shembullore. Nuk do të ketë asnjë tolerancë për dhunën”, tha Valditara.
Rasti ka hapur një debat të gjerë mbi gjuhën e urrejtjes në rrjet dhe kufijtë moralë të politikës, sidomos kur sulmet prekin familjarët e figurave publike.
