Pas shumë muajsh pritje dhe spekulimesh nga fansat e sagës më të famshme të spiunazhit, duket se zgjedhja e aktorit të ardhshëm që do të luajë James Bond-in është ngushtuar ndjeshëm. Sipas burimeve nga Variety, vetëm tre emra janë ende në lojë: Jacob Elordi, Tom Holland dhe Harris Dickinson.
Ndonëse Elordi është australian, ai vazhdon të konsiderohet seriozisht për rolin, pasi përzgjedhja është përqendruar te aktorë nën moshën 30-vjeçare me një profil ndërkombëtar. Regjinë e filmit të ardhshëm do ta marrë në dorë Denis Villeneuve, i njohur për veprat e tij vizionare, i cili ka deklaruar: “Projekti është një nder i madh dhe një përgjegjësi e shenjtë,” duke shtuar se “ka dashur gjithmonë të jetë pjesë e kësaj bote që në fëmijëri,” shkruan DailyMail.
Për herë të parë që pas dekadash, kontrolli mbi ekskluzivitetin e James Bond nuk është më në duart e Barbara Broccoli dhe Michael G. Wilson. Amazon e mori drejtimin pas një marrëveshjeje madhore, dhe tashmë producentët e rinj, Amy Pascal dhe David Heyman, do të përcaktojnë drejtimin e ri të agjentit 007.
Xhirimet mund të zhvendosen nga Londra në Liverpool për shkak të kufizimeve logjistike në kryeqytet. Ndërsa spekulimet për datën e premierës variojnë, ekspertët mendojnë se fansat mund ta presin filmin më së shpejti në fund të vitit 2026 ose në 2027.
Ndërkohë, një tjetër zhvillim i ka bërë fansat të ngulmojnë në një emër tjetër për rolin. Aktori Patrick Gibson është bërë objekt diskutimi pas publikimit të lojës zyrtare “007: First Light”, e cila vjen me mbështetjen e Amazon MGM Studios. Në lojë, Gibson jep zërin e një James Bond 26-vjeçar, që sapo ka dalë nga Marina Mbretërore.
Pamjet e para të lojës kanë bërë bujë online, duke treguar Bond-in në skena të fuqishme aksioni, makina Aston Martin dhe humorin tipik të spiunazhit britanik. Siç shkruan DailyMail, kjo ka shtuar zërat se Gibson mund të jetë një “provë” për versionin e tij në ekranin e madh.
Një gjë është e sigurt: për Bond-in e ri pritet më shumë se një fytyrë e bukur. Të gjithë sytë janë tek vendimi përfundimtar që do të vulosë kapitullin e ardhshëm të një prej figurave më të dashura të kinemasë.
