Khloé Kardashian ka vendosur të jetë më e sinqertë me ndjekësit e saj dhe me veten. Në episodin e fundit të podkastit të saj Khloé in Wonderland, të publikuar më 17 korrik, ylli i reality show-t dhe bashkëthemeluesja e markës “Good American” foli hapur për marrëdhënien e saj të kaluar me përdorimin e Photoshop-it dhe filtrave në rrjetet sociale.
“Nuk e bëj,” tha Kardashian, duke iu përgjigjur akuzave të shpeshta se çdo foto e saj kalon përmes modifikimeve dixhitale. “Por ishte një kohë që patjetër që e bëja. Pata pranë disa njerëz që më bënin të ndihesha sikur kisha nevojë ta bëja. Ishte edhe pjesë e kohës – të gjithë përdornin Photoshop, ndoshta më shumë sesa tani.”
Khloé pranoi se ndonjëherë ende ndjen pasiguri dhe dëshirë për të përdorur filtra, por tani ndjehet më mirë me veten, sidomos në video: “Ka ditë kur them, uf, më duhet një filtër. Por më pëlqen vetja më shumë në video sesa në fotografi. Nuk mendoj se jam shumë fotozhenike, por do të bëj 500 foto për të gjetur një që më pëlqen – dhe kjo është në rregull.”
Në një reflektim të sinqertë, Kardashian pranoi se në disa nga fotot e saj të vjetra ajo duket “si një personazh vizatimor” dhe e quan “poshtëruese” që dikur mendonte se ai version i modifikuar ishte më i bukuri.
Deklaratat e saj sinjalizojnë një ndryshim të rëndësishëm në mënyrën si ylli i The Kardashians e sheh veten dhe ndikimin e imazhit të saj publik. Në një epokë ku presioni për “perfeksionin dixhital” është më i madh se kurrë, mesazhi i Khloé mund të frymëzojë ndjekësit të pranojnë veten më natyrshëm – edhe pa filtra.
