Në një rrëfim të sinqertë në “The Dalina Show”, Vesa Luma zgjodhi për herë të parë të flasë për fjalët që qarkulluan për martesën e saj me Big Bastën. Në vend që t’i mohojë, ajo pranoi se pas zërave kishte një grimë të vërtete.
“Unë kam pasur një fëmijëri shumë të vështirë, që nga mungesa e figurës kryesore që është babai, lufta, duhej të hyja në punë menjëherë sepse duhej të ndihmoja nënën që ishte shumë e re,” rrëfeu ajo, duke shpjeguar se vështirësitë e së kaluarës ndikojnë ende në marrëdhënien e saj. “Edhe unë edhe Geri \[Big Basta] kemi momente kur nuk jemi mirë, kemi përplasjet tona, po fjala e fundit nuk është thënë asnjëherë.”
Një nga periudhat më sfiduese ishte pjesëmarrja e Big Bastës në reality show-n “Ferma VIP”, që për Vesën solli pasiguri dhe frikë.
“Në rastin e Fermës ka diçka të vërtetë sepse unë realisht nuk kam menduar në ndonjë moment që Geri të jetë në një ambient të tillë, duke e ditur natyrën e tij shumë të qetë… Kisha dhe frikë se ai mos përballej me një dëshpërim tjetër që mund të sillte ndonjë vendim të nxituar,” shpjegoi ajo.
Megjithatë, kur vendimi ishte marrë, Vesa qëndroi në krah të bashkëshortit:
“Sado që kemi profesione të njëjta, asnjëherë s’kemi marrë vendime njëri për tjetrin, vetëm mbështesim njëri-tjetrin dhe në momentin që thashë ‘po të mbështes’, thashë ‘do të të mbështes 100%’, kur u pajtova.”
Përse nuk reagoi publikisht, kur lajmet për një ndarje qarkulluan kudo?
“Dhe unë besoj që mund të më ketë shpëtuar ndonjë fjalë te dikush… Pastaj, i kanë edhe çikë qejf njerëzit këto gjëra, në momentin që del një lajm ‘u nda Vesa me bashkëshortin’, fillojnë dhe vazhdojnë radhazi ato dhe nuk ndalojnë më dhe çfarëdo që ti thua më pas, thjesht është e kotë.”
Në vend të një reagimi të menjëhershëm, ajo zgjodhi të mos e errësonte figurën e Gerit në sytë e publikut.
“Shpesh më thonë njerëzit pse s’kam reaguar atëherë. Unë me Gerin kemi qenë gjithmonë bashkë. Dhe ishte moment shumë i mirë që të tregonte Geri gjithë vlerat që kishte dhe nëse unë do të reagoja në atë moment, prapë njerëzit do merren me Vesën dhe Big Bastën.”
Pavarësisht se zërat u keqkuptuan, Vesa është e qartë për statusin e marrëdhënies së tyre:
“Mund ta them me bindje të plotë, kemi pasur mosmarrëveshje, por s’jemi ndarë kurrë. Jam shumë me fat që kam Gerin në jetën time sepse është një mbështetje shumë e madhe. Jetën familjare e kemi kult, nuk luajmë me atë gjë.”
