Një fotografi që ngjall emocione të forta dhe që ndriçon pasojat e rënda të luftës mbi civilët u shpall “Fotoja e Vitit” nga “World Press Photo 2025”. Portreti i Mahmoud Azour, një djalë palestinez 9-vjeçar që humbi të dy krahët gjatë një sulmi izraelit në Gaza, është realizuar nga fotografja palestineze Samar Elouf për The New York Times.
Pas shpërthimit që i mori krahët, Mahmoud u transportua në një spital në Doha, ku po mëson të përshtatet me jetën e re. Fotoja e tij u përzgjodh për forcën vizuale dhe emocionale që mbart, duke vënë në qendër jetën e një fëmije dhe pasojat e një konflikti të zgjatur.
“Një nga gjërat më të vështira, siç më shpjegoi nëna e Mahmoud-it, është se kur ai kuptoi se i ishin prerë duart, gjëja e parë që i tha asaj ishte: ‘Si do të të përqafoj?’” – tha Samar Elouf.
Elouf, me origjinë nga Gaza, ka dokumentuar për vite me radhë jetët e palestinezëve të plagosur rëndë dhe të zhvendosur në Doha. Kjo fotografi përfaqëson jo vetëm historinë e një fëmije të caktuar, por edhe një realitet më të gjerë.
“Është një fotografi e heshtur, por flet me zë të lartë. Ajo tregon historinë e një djali, por edhe të një lufte të madhe që do të shënojë brezat e ardhshëm,” – tha Zoumana El Zein Khoury, drejtore ekzekutive e World Press Photo.
Juria e vlerësoi foton për mënyrën se si kap momentin, ndriçimin dhe temën që përçon, duke sjellë në qendër pyetjet mbi të ardhmen e Mahmud.
Aktualisht, Mahmoud po mëson të kryejë veprime të përditshme me këmbët e tij – të përdorë telefonin, të shkruajë, të hapë dyer – ndërsa mban shpresën për një jetë sa më normale.
“Mahmoud ka një ëndërr shumë të thjeshtë: ai dëshiron të vendosë proteza dhe të jetojë një jetë si çdo fëmijë tjetër,” – shkruajnë organizatorët e World Press Photo në një deklaratë.
Nëse kjo dëshirë realizohet, ai do të mund të përqafojë sërish nënën e tij – një gjest i thjeshtë, por i mbushur me kuptim të thellë.
Çfarë është World Press Photo?
World Press Photo është një organizatë ndërkombëtare që promovon fuqinë e fotografisë dokumentare. Çdo vit, ajo organizon një konkurs global ku vlerëson fotografitë që pasqyrojnë ngjarjet më të rëndësishme dhe të ndjeshme të vitit në mbarë botën. Çmimi “Fotografia e Vitit” konsiderohet ndër më prestigjiozët në fushën e fotolajmit.
