Gara deklarohet e hapur mes emrave të njohur dhe të rinj
Pritjes i erdhi fundi. Janë zbuluar sot emrat e këngëtarëve pjesëmarrës në Festivalin e Fundvitit. Komisioni i përzgjedhjes së Festivalit të 64 të Këngës në RTSH me drejtore artistike artisten Elhaida Dani, ka shpallur zyrtarisht listën e artistëve që do të ngjiten në skenën magjike të këtij edicioni. Këtë vit janë përzgjedhur 28 artistë, mes të cilëve spikasin emra të njohur të muzikës shqiptare, rikthime të rëndësishme të artistëve që kanë lënë gjurmë në muzikën moderne, por edhe zëra të rinj që do të prekin për herë të parë skenën e festivalit një trampolinë e vërtetë për të nisur ngjitjen në karrierën e tyre muzikore.
Mes emrave që do të garojnë këtë vit është këngëtarja shumë e dashur nga Kosova, Fifi, e cila në këtë edicion vjen në duet me Tiri Gjocin, me të cilin ka bashkëpunuar edhe më herët. Po ashtu, në listë gjendet edhe Alis, i cili në Festivalin e 63 u vlerësua me vendin e tretë me këngën “Mjegull”. Një tjetër rikthim është ai i artistit Vedat Ademi.
Në garë do të jenë edhe Evi Reçi, Sheila, Kamela Islamaj, Gerta Mahmutaj, Erik Lloshi, Enxhi Nasufi dhe Gresa Gjocera, ndërsa në këtë edicion rikthehen gjithashtu Lorenc Hasrama, Luna Causholli dhe Kleansa Susaj. Grupi 2 Farm, pjesëmarrës në Festivalin e 61, është një tjetër rikthim i shumëpritur.
Përveç artistëve të njohur, festivali do të mirëpresë edhe emra të rinj që garojnë për herë të parë. Një prej tyre është Egzon Pireci, me origjinë nga Prizreni, i cili ka nisur rrugëtimin artistik që në moshë të vogël. Po për herë të parë në Festivalin e Këngës garon edhe Iris Neziri, një tjetër emër i njohur për publikun. Gjithashtu emra të tjerë që do të bëhen pjesë e këtij edicioni janë Threex, Sihana Haxhnikaj, Savjana Vjerdha, Sara Kapo, Rigersa Loka, Rezarta Smaja, Malvina Likaj Kimi, Ghiti, si edhe Endri Kaçaçi .Ndërkohë, surpriza e këtij edicioni është pjesëmarrja e aktorit të njohur Erand Sojli, që këtë herë do të ngjitet në skenë si këngëtar.
Festivali i 64 i Këngës në Radio Televizionin Shqiptar do të vijë nën drejtimin artistik të Elhaida Danit, për katër net me radhë, ku publiku do të ketë mundësi të shijojë muzikën e artistëve të tij të preferuar. Nata e parë dhe e dytë do të jenë netët konkurruese, nata e tretë do t’i kushtohet nostalgjisë një natë shumë e dashur për publikun ndërsa nata e katërt do të jetë finalja e madhe.
Ashtu si edhe vitin e kaluar, gjatë muajit nëntor pritet të publikohen edhe këngët konkurruese të artistëve pjesëmarrës, duke i dhënë publikut mundësinë të njihen më herët me krijimet e tyre muzikore.
LISTA E PLOTE
1. 2 FARM
2. ALIS
3. EGZON PIRECI
4. ENDRI KAÇAÇI
5. ENXHI NASUFI
6. ERAND SOJLI
7. ERIK LLOSHI
8. EVI REÇI
9. FIFI & TIRI GJOCI
10. FRENSI
11. GERTA MAHMUTAJ
12. GHITI
13. GRESA GJOCERA & BLEDI KASO
14. INIS NEZIRI
15. KAMELA ISLAMAJ
16. KIMI
17. KLEANSA SUSAJ
18. LORENC HASRAMA
19. LUNA ÇAUSHOLLI
20. MALVINA LIKAJ
21. REZARTA SMAJA
22. RIGERSA LOKA
23. SARA KAPO
24. SAVJANA VJERDHA
25. SHEILA
26. SIHANA HAXHNIKAJ
27. THREEX
28. VEDAT ADEMI
