Hip hop ylli i Babastars, Cozman, ka publikuar ditë më parë projektin e ri të titulluar “Yamborghini”. Një projekt i fuqishëm nga reperi i Babastars që tërhoqi vëmendjen për luksin e pa parë ndër artistët shqiptarë dhe tekstin me shumë thumba për rivalët. Deri tani klipi ka arritur mbi 200 mijë klikime në më pak se 24 orë, kurse vet reperi u shpreh i kënaqur me suksesin në një prononcim për Telegrafin.
Por, ky klip duket se i ka kushtuar reperit një mal të hollash.
Sipas një hulumtimi të thjeshtë, makinën të cilën e ka përdorur Cozman në këtë videoklip është e llojit Lamborghini Aventador 2017 ngjyrë të zezë, e cila ka një vlerë rreth gjysmë milioni euro. Edhe pse klipi ishte kryesisht i bazuar në koncept rreth kësaj veture, ky nuk është aksesori i vetëm luksoz që ai ka përdorur. Është edhe ora shumë e veçantë e tipit “Audemars Piguet Royal Oak Automatic Rose Gold Blue Dial” e cila kushton rreth 50 mijë euro (42,600 funte). Ndër aksesorët e tjerë të përdorur është edhe qaforja super luksoze e reperit e cila ka një vlerë rreth 30 mijë euro dhe është e prodhuar në mënyrë të veçantë për reperin me emrin e tij në Londër. Ky videoklip tërhoqi vëmendje nga mediat në orët e para të lansimit, sidomos për luksin e madh me të cilin është paraqitur reperi i Babastars.
