Balerina Klaudia Pepa është tashmë një yll ndërkombëtar. Prej ditës së parë në “Amici” si konkurrente e sot si profesioniste ajo ka shkëlqyer. Balerina e dikurshme e TV Klan ka bërë për vete publikun italian dhe ka zgjuar ndjenjën e krenarisë tek ai shqiptar. Dhe pikërisht në një prej netëve të këtij spektakli, fundi i një prej kërcimeve të balerinës sonë, ishte i papritur. Partneri i saj në kërcim, Alesio, tentoi ta puthte në buzë. Kjo shkaktoi ovacione në publik dhe u përfol gjatë më pas. “Shumë e komentuar puthja e Alesios. Ai është një nga ata djemtë që dashurohet shpejt me vajzat. Në rastin tim ai më kërkonte shpesh mua dhe produksionit që në fund të koreografisë të më jepte një puthje, por unë refuzoja. Kur kjo pjesë doli në skenë ai u afrua të më puthte por nuk ia arriti e kjo gjë krijoi një atmosferë argëtuese dhe publiku qeshi me Alesion ‘mistrec’”, sqaron balerina. Tashmë Klaudia punon në Itali në “Canale 5” ndërsa bashkëshorti i saj, koreografi Albi Nako vazhdon punën në Tiranë. Mirëpo largësia nuk e ka dëmtuar marrëdhënien e tyre, përkundrazi. Siç tregon vetë balerina në një intervistë për gazetën “Paloma”, ndjenja për bashkëshortin sa vjen e i shtohet. “E rëndësishme është që jemi vazhdimisht në prani të njëri-tjetrit, për të mos thënë që shpesh i hipim avionit, sa unë e sa ai, duke e bërë rrugën Romë-Tiranë si Tiranë-Durrës. Sigurisht që Albi më mungon, kur gjejmë hapësirë kohore mundohemi të jemi afër njëri-tjetrit sepse për momentin ky është një vit sacrifice për ne duke qenë se punojmë në vende të ndryshme dhe nuk e shohim njëri-tjetrin kur hapim e mbyllim sytë. Ky është realiteti i momentit, por them që kjo largësi më ka bërë të dashurohem nga e para me Albin”, ka treguar Klaudia.
