Në ditët e sotme videoklipet zënë një pjesë tepër të rëndësishme në promovimin e një artisti dhe sigurisht ndikojnë në suksesin e një kënge. Duke qenë se imazhi është kaq shumë thelbësor, të gjithë artistët përpiqen që çdo skenë të klipeve ta kenë të kuruar në detaje. Për këtë arsye shumë prej tyre as nuk mendojnë për shpenzimet e tepërta, duke paguar miliona për të realizuar një videoklip që do të marrë aprovimin e publikut. Gjithmonë është vënë re se në klipet shqiptare ka një tendencë për të promovuar jetën luksoze me makina super të shtrenjta. Ndërsa këtë verë duket se “doza” e kësaj jete luksoze po shtohet më tepër, duke qenë se përveç makinave po shohim shumë jahte apo anije që nuk mungojnë në videoklipe, sidomos në ato të këngëtarëve meshkuj. Tashmë një videoklip veror nuk mund të quhet i plotësuar nëse përveç makinave dhe disa vajzave të bukura, nuk ka edhe një jaht apo anije të madhe që shëtit nëpër bregdet. Si fillim kjo sfidë u duk sikur u nis nga viti i kaluar kur Ledri Vula dhe Lyrical Son tërhoqën vëmendjen e të gjithëve me jahtin e tyre në këngën “Princess Diana”.
Ndërsa vetëm këto ditët e fundit kemi vënë re se në tre videoklipe të Capital T, Genc Prelvukaj dhe Butrint Imerit ky ka qenë elementi kryesor.
Mund të themi se kjo është përhapur si një lloj sfide mes artistëve se cili prej videoklipeve do të bjerë më shumë në pah për promovimin e jetës luksoze. Vera nuk ka mbaruar ende, prandaj na mbetet ende të shohim një paradë të gjatë me jahte, skafe dhe anije. /revistawho.com
