Atletja e njohur shqiptare, Luiza Gega ia doli të ngrejë flamurin shqiptar në Lojërat Mesdhetare, në Terragona të Spanjës vetëm dy ditë më parë. Ajo zhvilloi një garë të shkëlqyer në disiplinën 3000 metra me pengesa, duke u renditur e para dhe duke fituar medaljen e artë. Shumë e përgëzuan për arritjen duke filluar nga figurat e njohura të ekranit e deri te njerëzit e thjeshtë.
Ndërsa sot vjen një reagim nga Klodiana Shala, e cila është një nga figurat më të rëndësishme të sportit në Shqipëri. Krahas fotos së Luizës ajo shkruan e revoltuar për kushtet e këqija në të cilat është detyruar të stërvitet sportistja që bëri krenar shqiptarët.
“Medalja e Artë e Luizës gjatë ‘Lojërave Mesdhetare’ në disiplinën e 3000m me pengesa duhet t’i vendosë me shpatulla për muri institucionet shqiptare të sportit. Rekord i ‘Lojërave Mesdhetare’, pra asnjë më parë s’ka vrapuar më shpejt se ajo. Ndërkohë shteti hesht!
Prej më shumë se 15 muajsh asnjë fond nuk është nxjerrë për të në lidhje me stërvitjen dhe grumbullimet e shumta që është e detyruar të bëjë pasi Tirana s’ka më asnjë pistë atletike dheu e jo me tartani. Çfarë janë këta zyrtar që trumbetojnë me të madhe medaljet, ndërkohë që kur kërkohen mbështetje me lekët e taksapaguesve gjejnë çdo mënyrë për t’i harxhuar ato fonde me të ashtuquajturit ‘projekte’ ku dhe ato pak fonde u vidhen e u grabiten sportistëve. Turp…..”,- shkruan Klodiana./revistawho.com
