KODI ETIK NE PS/ Nuk lejohen burrë e grua deputetë. Po Xhaçka me Gaçin?

Kodi i ri i Etikës i miratuar dje në mbledhjen e Asamblesë Kombëtare të Partisë Socialiste ka vendosur disa sanksione në lidhje me forumet partiake. Neni 9 i këtij kodi kufizon qenien në të njëjtin forum, asamble, grup parlamentar apo kabinet qeveritar të familjarëve. “Nuk mund të jenë njëkohësisht në përbërje të së njëjtës strukturë drejtuese (Asamble Socialiste, Asamble Kombëtare) persona që lidhen nga marrëdhëniet: bashkëshortë, prind–bir/bijë, vëlla­motër, vjehërr– dhëndër/nuse. Në rast se në përfundim të një procesi zgjedhor rezulton se përbërja e strukturës përkatëse drejtuese bie në kundërshtim me përcaktimin e mësipërm, çështja zgjidhet me dorëheqje ose me short. Nuk mund të jenë në të njëjtën kohë kryetar i PS­së i bashkisë dhe kryetar bashkie/ komune, drejtues kryesorë të PS­së dhe të zgjedhur ose të emëruar në funksione politike si deputet, zv.ministër, ministër etj., persona që lidhen nga marrëdhëniet familjare të përcaktuara në pikën 1 të këtij neni”, thuhet në nenin 9 të Kodit Etik. Ndërsa në nenin 13 të Kodit të ri Etik, neni 13 përcakton dhe mënyrën se si duhet të jenë komunikimet me median apo publikun. Në çdo rast, çdo komunikim duhet koordinuar me Zyrën e Marrëdhënieve me Median. “Komunikimet me median për çështje që implikojnë qëndrimet politike të PS­së bëhen përmes Zyrës së Marrëdhënieve me Median ose në konsultim me të. Anëtari i PSsë i zgjedhur në organe drejtuese të Partisë dhe të forumeve të Rinisë e të Gruas nuk mund të shprehet në emër të PS­së për çështje që kërkojnë një vendimmarje politike pa u konsultuar më parë me strukturat përkatëse vendimmarrëse”, thuhet në nenin 13. Kjo nuk ka kufizim as për deputetë apo anëtarët e kryesisë. “Asnjë anëtar i kryesisë, Asamblesë, apo deputet, nuk mund të deklarohet në publik ose me forma të tjera, për çështjet e diskutuara në mbledhjen e kryesisë apo Asamblesë, kur për to vendoset të jenë të mbyllura”, thuhet në Kodin Etik të PS­së. Por edhe pjesëmarrësit në debatet publike si përfaqësues të PS­së duhet të konsultohen paraprakisht me Zyrën e Marrëdhënieve me Median, lidhur me qëndrimet e Partisë për çështjet në diskutim. Ne grupin parlamentar socialist jane te martuar Olta Xhacka dhe Artan Gaci, megjithate, ligjerisht, Kodi i ri Etik i PS­se nuk ka efekte prapavepruese./ Panorama