Ishte një adoleshente plot ëndrra kur u shfaq për herë të parë në ‘Ethet e së Premtes’. E pamë të rritej pak nga pak bashkë me skenën, por ëmbëlsia që e karakterizon e ka shoqëruar gjithmonë. Bëhet fjalë për këngëtaren që tashmë pret të bëhet nënë, Xhensila Myrtezaj.
Në daljet e para, Xhensila u shfaq si një vajzë e ndrojtur, por me talentin dhe simpatinë e saj arriti të fitonte zemrat e të gjithëve. Pak nga pak ajo filloi të rritej, por brenda saj Xhensila vazhdonte të ishte ende një çupëlinë e ëmbël që të rrëmben menjëherë vëmendjen me zërin e saj. Ajo gjeti dhe dashurinë e jetës, Bes Kallaku, e më pas filloi që çdo këngë e saj të merrte një karakter romantik. Xhensila përsëri nuk ndryshoi në videoklipe, shfaqej gjithmonë e veshur me fustane tipike të një kukulle Barbie.
Por për një moment kur i gjithë tregu muzikor shqiptar filloi të transformohej edhe Xhensila filloi të ndryshonte disi. Me këngët ‘Ring the Alarm’, ‘High Love’, ‘Ama dorën’, Xhensila tentoi të shfaqte një stil pak më agresiv për t’u afruar me shijet e publikut të ndryshuar. Megjithatë ëmbëlsia e saj bëri që të rikthehej përsëri në të njëjtin stil të mëparshëm.
Së fundmi këngëtarja pret të bëhet nënë për herë të parë dhe kemi parë se dhe tani nuk ka mundur t’i largohet stilit të saj prej çupëline. Kohët e fundit e kemi parë të veshur më së shumti me këmisha dhe ngjyra shumë të ëmbla. Mund të përmendim edhe daljen e saj “Në kurthin e Piter Pan”, në të cilin ngjante njëlloj me vajzat e vogla të emisionit e veshur me fustanin ‘pink’ dhe me fjongon që mbante në kokë. Kjo do të thotë se Xhensila mund të kalojë stade të ndryshme në jetë, por ka për të mbetur e njëjta çupëlinë gjithmonë. /revistawho.com
