New York-u, është vendi të cilin stilisti i famshëm shqiptar, Ardi Asllani, zgjodhi të prezantojë koleksionin e tij më të fundit me një titull intrigues “My Albania”. I kontaktuar ekskluzivisht nga RevistaWho.Com, stilisti tregon që ky është një koleksion i cili në ndryshim nga krijimet e mëparshme që kanë patur për inspirim motive nga Folklori Shqiptar, këtë herë kryekëput vjen ndryshe… Asllani e ka bazuar të gjithë koleksionin e tij, mbi imazhet e qyteteve shqiptare, të cilat pasi janë dizenjuar e përpunuar grafikisht, janë plotësuar mbi tekstil duke i dhënë atij nje trajtë komplet të ndryshme nga gjendja fillestare… Do të shfaqen për herë të parë në New York, Tirana e viteve 1930, Kruja, Gjirokastra e Berati, Ulqini e Prizreni e disa qytete të tjera shqiptare. Një zgjedhje kjo e stilistit për të mos shkuar në NYC me atë çka ai qytet e ka me shumicë “glamourin”, por me diçka tepër speciale dhe të rëndësishme me një “shije shqiptare”. Veshjet të punuara në organze dhe saten vijnë në tonalitete pastel plot shkëlqim të punuara mjeshtërisht nga krijuesi i imazhit të shumë e shumë personazheve në Shqipëri. Në Kaufman Studios modelet amerikane dhe shqiptare do të kenë të veshura qytetet tona me historinë, kulturën dhe sharmin e tyre që për NewYork-ezet do të jetë diçka ndryshe dhe njëkohësisht ekzotike. / revistawho.com
