Nga Ajn
Dita 17 e izolimit. Kemi 223 të infektuar, 12 prej të cilëve kanë humbur jetën. Nuk është më lajm që jemi tepër të rënduar psikologjikisht dhe fizikisht. Kufijtë janë mbyllur tashmë dhe ndihemi më vetëm se kurrë.
Me sytë nga mediat presim që në ekran të gjejmë formulën e shpëtimit, vaksinën a lejedaljen.
Nobelisti në kimi, Michael Levitt, ka qetësuar botën duke u shprehur se kjo situatë do të përfundojë më herët se parashikimet e qeverive (dhe të mendosh se kurrë nuk u kam besuar qeverive). Parashikimet e Levitt-it kanë qenë profetike në Kinë ndaj prononcimi i tij dha shpresë.
Veçse çdo gjë që dimë sot e dimë prej informacionit nga mediat. Dhe mes mijërave të prekurve në biznese, media është ndër më të “infektuarat”. Reklamat që ranë me 15% gjatë marsit pritet të bien me 30-40% gjatë prillit duke i çuar mediat në kolaps të rrezikshëm. Shumë gazetarë kanë humbur punën dhe të tjerët që ende punojnë do e kenë të vështirë të paguhen. “Thesi” i qeverisë nuk ka për të gjithë dhe gjasat janë që media të shihet si luks në këtë situatë, ndonëse nuk është. Problemet janë të njëjta për mediat e mëdha dhe për portalet, pavarësisht se shumat që japin në fund të muajit janë të ndryshme, edhe ato që merrnin janë po aq. Media është e shtruar në spital, në reanimacion, ende pa frymëmarrje të drejtuar. Media ka sakrifikuar luksin e spektakleve të mëdha, por nuk duhet gjithsesi të sakrifikojë informacionin. Ai mbetet oksigjeni.
P.S.
E(h)-Albanias i ra serveri. Në lock-down edhe ai si ne. Sot dola fshehurazi nga shtëpia për të blerë jeshillëqe. Zbulova se një kurorë brokoli shitej për 300 lekë. Edhe çmimet janë çmendur si të gjithë. Dhe brokoli është mall luksi ?./revistawho.com
