Nga Ajn
Dita 35 e karantinës. Sot 21 raste të reja, 539 të infektuar. Kemi një javë me kurbë të qëndrueshme me 20 raste çdo ditë, ndërsa kurbën ekonomike e kemi rrafshuar. Bashkimi Europian është në ditët e tij të provës së madhe që pas krijimit, nëse do jetë më i fortë apo pas kësaj situate do të shkërmoqet. Njëherit bota është ndarë më dysh, disa pretendojnë që Kina ka fshehur të dhëna mbi dhe për kohën e virusit dhe një e dytë, sugjeron që virusi mund të mos ketë lindur në Hubei dhe Wuhan, por diku tjetër. Ka një të tretë e publikuar nga nobelisti i mjekësisë, francezi Luc Montagnier, sipas të cilit virusi është manipuluar për të shpikur vaksinë për HIV-AIDS, por ai thotë se natyra e zhbën këtë manipulim, por duhet kohë. Mes këtyre teorive, një bote të mbyllur, luftrave të ndalura, ekonomive në pikë vdekjeje, qëndron një realitet i ri, ose ai që rëndom po quhet rend i ri, e që mua s’më ngroh aspak sepse nuk ka gjë më të shtrenjtë se liria që kemi pasur fatin e madh të jetojmë. Dhe kur shtetet më të mëdha e më të lira, kanë kufizuar liritë, gjithë ç’mbetet është të lutemi që ky makth të marrë fund. Por, në laminë e këtyre teorive, dr.Pëllumb Pipero thotë që duhet të dalim që të ekspozohemi me kujdes, duke nënkuptuar një version të moderuar të asaj që njihet si ‘imuniteti i tufës’, por aq i kujdesshëm sa që të jetë i ngadaltë dhe i shtruar për të mos krijuar mbingarkim spitalesh. Pra, ne duhet ta kalojmë, por me radhë që të kemi mundësi të marrim shërbim mjekësor. Një tufë e trembur si ne!
P.S. Nesër gjyshërve u lejohet të dalin xhiro. Ne duhet t’i lëmë rrugët e lira për ta./revistawho.com
