Nga Ajn
Dita 44 e karantinës. 736 të infektuar, 10 sot. Burgjet po mbushen me të sëmurë, fasoneritë ankohen se nuk punojnë dot me kushtet e mbrojtjes që ka kërkuar qeveria. Ne të tjerët po ashtu. Qeveria thotë se nuk do ketë më paketë ekonomike ndihmëse, ndërsa ne që nuk patëm shpresuar kurrë, e dimë se edhe dy të parat qenë pikatore. Njerëzit po dalin në punët e lejuara, por fuqia blerëse ka rënë, konsumi po ashtu. Do na duhet kohë për të marrë veten, ndërsa ekonomia është tashmë në terapi intensive. Italia nis më 4 maj hapjen e madhe përveç restoranteve, kafeve e masazherive. Verën do e kalojmë me maska në gojë e hundë e krem dielli në ballë.
Sot megjithë mbretërimin e sëmundjes, viktimë e tij ka qenë vetëm një pacient. Ndërsa për arsye që nuk i dimë, ka pasur dy vrasje në Lezhë, dy në Durrës dhe të dy vetëvrarë. Krimi ka dalë nga izolimi dhe është lëshuar në sulm, duke gjetur një terren të lirë. Në pothuaj 2 muaj që ne mbetëm në dhomë gjumi- kuzhinë, jashtë pothuaj gjithçka kaloi si të mos ishim.
Tani, ndërsa po mësohemi me mospasjen, tashmë kemj koronë, krim dhe kredi. Borxhet tona janë rritur, borxhi ndaj atyre që nuk i takuam, borxh ndaj jetës sonë, ndaj prindërve e miqve, ndaj punëve që lamë e që na lanë, ndaj gjërave që mund të kishim bërë, ndaj bankave e dyqaneve, ndaj të pamundurve që vuajtën urinë, ndaj atyre që u rrezikuam jetën, ndaj atyre që që i pritëm e nuk erdhën, ndaj atyre që i lamë vetëm, ndaj mundësive që humbëm përgjithnjë dhe ndaj ëndrrave tona. Koronë, krim dhe kredi- but that’s life!
